Digitale Charterbank Nederland

Ick broeder Gherit vanden Berghe gardiaen des cloesters ende convents vanden mi(n)rebroederen binnen Dordrecht doe condt allen luijden die dese iegewoirdighe
letteren sullen zien of hoeren lesen dat ic eenen brief gesien heb goet gave ende ongecanceleert ongeraseert sonder suspicie ende wel besegelt mit dese
edelen geboirtigen uuthangende segel he(r)en Arent van Strien here tot Sevenberghen spreeckende van woirde als hijer na gescreven staet

Wij Aernt van Strijen here tot Sevenberghen e(cetera) doen condt allen luijden ende bekennen mit desen onsen brieve dat wij mit goeden ende rijpen rade ende wel verdacht
mit onsen vrienden ende bij consent ende goetduncken van onsen gueden ende getrouwen borgemeijsteren scepenen ende rade ende alinge gemee(n)te onsen onder-
saten van Sevenberghen om te vervallen ende te bet te betalen sulcken schulden ende afterwesen dair wij in comen zijn overmidts der stede ende heerlicheden van
Sevenberghen wil an ons ende an onsen erven ende nacomelingen weder te vercrigen wittelijcken ende mit vrijen moetwille vercoft hebben Ghijsbrecht Quekel
Ghijsbrechtssoen ende Heijnrick van Diemen Florissoen onse lieve geminde zwager ende goede vrienden ende haren erven ende nacomelinghen die drifte
ende gorssen nu genomt der meenten Gorssen gelegen ande Zwaluve tusschen die sloet genoemt die Sprange optie noirtsijde ende die riole die loopt
nevens die Moerdrifte die der joncfrou van Leck plagen toetebehoren voir die oostzijde ende an die zuijtzijde van IJobbekens Werve Linde recht ther
riolen thoe voirs(creven) mit hoge mit leeghe mitter heerlicheijt die dair toebehoirt ende mit anders alle sinen toebehoren soe groet ende cleijn ende in alre manij(r)en
als die toebehoirde(n) heere Otten vander Lecke wilneer here tot Hadele e(tcetera) Ende die he(r)en of voirn(om)t onsen lieven ende getrouwen borgemeestere onsen ondersate
ende poirten van Sevenbergen voirs(creven) vercoft ende die graeflicheijt van Hollant hem den vrijen eijghen dair af quijt geschonden heeft na inhoudt der brieven die dair
af zijn om een seker somme van ghelde dair ons Ghijsbrecht Queeckel ende Heijnrick van Diemen beijde voirs(creven) wel te wil betaelt ende te danck gelevert
ende al voldaen hebben den eersten penning ende den lesten hijer bij hebben wij gelooft ende gelooven voir ons ende voir onsen erven en(de) nacomelinge dat wij noch
onse nacomelingen uuten voirs(creven) driften ende gorsse ende hoeren toebehoren tot gheenre tijt zooden of aerde doen en sellen steecke noch oick nijet gehenge
te steecke ofte halen van ijemende, noch totter vesten noch totter dijckaedsen of neringen het wair van vorsschen of van sonten noch anderswairt in
eenigher manijeren ende voirt an te waren ende te vrien van allen com(m)er ende van allen anthale ende voir een ijegelijcke als wij schuldich zijn gelijcke
een vrij guet ende wairt dat hijer an ijet gebraicke so hebben wij ons voirder verbonden ende gelooft ende geloven voir ons ende voir onsen naco-
melinghe ons des tot gheenre tijt te were of te beschudde of tegens te comen mit eenighe rechten of andere saicke die ons of onse nacomelinge
mochten comen te stad ende Ghijsbrecht Queeckel ende Heijnrick voirs(creven) te hindere, die selve Ghijsbrecht en(de) Heijnrick beijde voirs(creven) of hoire erve ende
nacomelinge of die houder des briefs bij hoeren wille en sal ons onse ondersaten voirs(creven) onsen ende onsen ondersaten voirs(creven) gueden tot alle plaetse dair sij
die bevonden mogen doen uphouden besetten en(de) becom(m)eren ter tijt toe dat zij van haren gebreke ende van alle coste dair om gedaen of gelede vervocht
zullen zijn all ergelist ende fraude uuijtgeset In oirconde desen brieve besegelt mit onse segele hijer an gehange gedaen en(de) gegeve in onse stede
van Sevenberghe int jair ons Heren M CCCC drieenvijftich opten anderen dach van octobri.

Voirt heb ick broeder Gherijt vanden Berghe voirgenomt noch eenen brief gesien ende gelesen goet ende gave ende ongecancelleert ongeraseert sonder
suspicie ende wel besegelt mit des edelen hoochgeboeren voirsten uuijthangende segel hertoch Willem van Hollandt e(tcetera) inhoudende van woirde te woirde
als hijer na gescreven staet

Willem bijder genaden Goids Palensgrave opten Rijn hertoge in Beyere grave van Henegouwe van Hollant van Zeelant ende heere van Vrieslant doen condt alle
luden dat wij heren Otte vander Leck here van Hadel om menige dienste wille die hij ons gedaen heeft ende of God wil noch doen mach quijt gesconden
hebben ende quijtscelden mit desen brieve den rechten eijgendom die wij hadden an die twee overste driften gelegen an die Zwaluwe in Zuythollandt
die hij van ons te leen te houden plach ende hebben hem voirt geoirloft ende oirloven die voirn(omte) driften der stede van Sevenberghen te vercoepe tot
eenen vrijen eijghe welcke voirs(creven) driften die stede van Sevenberghe voirs(creven) oirbaren ende bruken zullen mogen in alre maten alse heere of voirs(creven) in
voirleden tijden tot desen dage toe geoirbairt ende gebruijct heeft In oirconden desen brieve besegelt mit onsen segele gegeven inden Haghe opte Heijlige
dertien avondt int jair ons heren duijsent vierhondert ende vier na den loop ons hoofs van Hollandt in kennisse der wairheijt soe heb ick broeder
Gherit vanden Berghe gardiaen voirgenomt dit vidim(us) ende transscrift uuijthangende besegelt mitten segel mijne officien gedaen int jair ons he(r)en
M CCCC vive ende tsestich opte laetste dach der maent van meije,

Gecollationeert jegens de vors(creven) copie aute(n)tijck uuijthangen(de) bezegelt mit een(en) zegele in rooden wasse
en(de) is benoden accorderen(de) opte IXen dach in meije a(n)no XVcXXXVI aldns bij mij
Jacq. Vries s(ecretaris)
NN

Tekst rechts in kantlijn?

Achterkant
Beroerende het lant
ande Swaluwe