Digitale Charterbank Nederland

Allen den ghenen die dese ken(nen) sullen sien oft horen lesen saluijt wij borgmees(er) ende scepen(en) en(de) rade der stad van Breda doen te weten ondersproe(ke)n voir
de gerechte waerheijt dat wij op huiden datu(m) deser ken(nen) hier over gescreven gesien hebben en(de) horen lesen een(en) fransijnen brief goet gans gave ende was
besegelt met een(en) gewoijnen wthangenden segel ongecanncelleert sonder eenige rasuere oft afdragende smette luijdende van woorde te woorde als hier in volght
Wij borgemeester(en) scepen(en) raede en(de) die ghemeen poorte van Sinte Gheertruidenberge doen cont en(de) kenlijcke allen luden dat wij bij gemenen raede (en(de) consente
om onser poorten schult te verleggen en(de) te betalen vercoft hebben Dijrck Jans zoen die Kock en(de) Margriet Henrick Mareijnen soons dochter inn wittiche
wijf hem beijden te samen tot haer beijder lijftochten en(de) den lanxsten levenden van hen beijden en(de) niet langer tien rijnsshe gulden tstuck voir twintich
stuiv(er)s gereke(n)t off peijment haerre weerden die wij hem beijden geloven te betalen van onser gemeente poort(er)en, wegen voir ons selven en(de) voir die gene
die namaels wesen sullen elcx siaers die een helft op Sinte Martinus dach inden winter comende en(de) die ander helft op Sinte Servaes dach elx siaers daar naast
volgende of bijnnen den eersten viertien dagen na elcken termijn voorss(chreven) als wij daer afgemaent wordden ombegrepen van Dijrck oft Margriet voirnoemt
en(de) den lancxste levende van hen beijden of van hae(re)n gewaerden bode die lesten brief thoenen sal of een transcrift daer van gemaect met warachtigen ende
gelooffelijken segele besegelt op alsulcke vorwaarden waert dat wij hem beijden off haeren gewaerden bode die desen brief oft een transcrift als voirss(chreven) thoinen sal
elcx siaers hair gelt met en betaelden tot alsulken(n) tijden als voirss(chreven) staet soe mach Dijrck en(de) Margriet wijf off die lancxstelevende van hen beijden off haer
gewaerde bode elcx dage vertheren op onse gemeijn poorts voirss(chreven) drie stuiv(ers) tot twee maenden toe en(de) daeren teijnde geloven wij hem voervoets te geven
hair hooftgelt en(de) haeren coste of twijstap panden van gereeden goede die men driven en(de) dragen mach dair zij voetstaens haeren wille mede mogen doen sonder
eenich wederseggen en(de) sonder enige lettenisse van enigen saken die wij d(aer)toe vijnden oft thoonen mochten die ons te hulpen souden mogen comen in eenigen
rechte van onser poorten wegen voirnoe(m)t voortdaen soe geloven wij den voirg(enoemde) Dijrck en(de) Margriet hen gelt te bestijnden waer zijs bege(vende)n ende zij ons laten we-
ten in wes heeren lande dat sij wesen sullen bijnnen twee milen weges na van onser poorten voors(chreven) op onser poorten costerende anxt bijnnen den voirg(enoemde) termine
in alle manieren als voorss(chreven) staet en(de) waert dat tsake dat wij des met en deden soe gelooven wij en(de) verwelcomende voir ons selven en(de) voir die ghene die
namaals wesen sullen tot wat steden oft in wes heeren lande dat Dijrck en(de) Margiet voirnoe(m)t off die lancxste levende van hem beijden enich van onsen
poirte(re)n of siin goet voirde dat sij die poirters of hair guedt met rechte aenveerden en(de) houden mogen onder allen haeren geestelijken en(de) weerlijken om onse
poirters oft haer guet come(nde) sal en(de) haer hooftgelt en(de) coste dair op winne(nde) en(de) wij sullen allen heden gelijc alsoo wel gheestelijken als weerlijken dat sij
ons poirt(er)s en(de) onse guede arrester(ende) aentaste(nde) ende houden willen dese voirnoe(m)de lijftochten en(de) van wairden merk te betalen ende voldoen en(de) wij geloven voir ons
selve en(de) voir die gene die namaels wesen sullen dat wij ons niet geerne vande rechte noch saken niet en sullen verwe(re)n die wij d(aar)toe vinden of thonen mogen
die ons te staden comen mochten tegens dese voirgh(enoemde) lijftochten tot wat tijden dats te doen waeren in alle manieren als voirsch(reven) staet in desen brief begrijpt en(de)
hier en boven soe sijnt vorwairden waert tsake dat wij in gebreke waeren dese lijftochten te betalen in altemael off in deele soe geloven wij voir ons
selven en(de) voir die gene die namaels wesen sullen allen stade coste en(de) commer te gelden en(de) te voldoen die op Dijrck en(de) Margriet voirss(chreven) off die lancxste
levende van hem beijden of haeren gewaerden bod thoenre des briefe off een transscrift als voirss(creven) staet bijden sal om dese voirg(enoemde) lijftochten te vercrigen ende
sij ter waerheijt toe brengen mogen sonder die principale schult te minderen off die drie stuijvers die sij daigs verteren(de) mogen tot haeren coste te helpen en(de) soe
wanneer dat Dijrck en(de) Margriet voirss(chreven) alle beijde van leve totter doot comen sijn soe sal onse poorte g ??. . . alijnge en(de) altemaele van deser voirss(chreven) lijftochten
vrije en(de) quijt wesen voortdaen wiert tsake dat Dijrck en(de) Margriet voirss(chreven) desen tegenswoirdige brief verloeren het waer bij brand bij dieften of anders
eenige ongevalle hoe dattet waer soe geloven wij Dijrck en(de) Margriet voirnoe(m)t een(en) anderen brief weder te geven sonder haeren coste gelijcke den transscrifte
van desen brieve alsoe goet met onser gemeente poorten zegel besegelt alle voirss(chreven) saken en(de) vorwairden sonder enigerhande argelist des tot enen oirconde
ende in kennisse der waerheijden hebben wij desen brief bezegelt met onse gemeene poorten zegel hier aen gehangen gegevene int jair ons heren dusent
vierhondert sesse en(de) tseventich opten seventienden dach in Meij en(de) want wij borgemeester(en) scepen(en) en(de) rade der voirss(chreven) stad van Breda desen voirss(chreven)
fransijnen brief alsoe gesien hebben en(de) horen lesen goet gans gave en(de) was besegelt met een(en) gruenen wthangenden segel ongecanceleleert sonder eenige
rasure oft afdragende smette gelijc voirschreven is, soe hebben wij borgem(eester) scepem(en) en(de) rade der voirs(chreven) stad Breda der selver stadzeghel aen
dit vidum doen hangen opten seventhiensten dach van december int jair ons heren dusent vierhondert drientnegentich.

(Achterzijde:)
N31
1493
Lijffrent op
N31

N.B. Herkomst: 2600. Archief stadbestuur Geertruidenberg, inv. nr. 350.